2.11.2013

თქვენი ცხოვრების ნახატი და წერილი საკუთარ მომავალს



წარმატების 365 დღე

თქვენი წარმატების მე–8  დღე


დღეს თქვენი წარმატების მე–8 დღეა. მადლობა ღმერთს, რომ წინა 7 დღესა და რჩევების წერილებში განვიხილეთ თუ როგორ განსაზღვროთ თქვენი ძირეული სურვილი, აიღოთ მიზანზე სრული პასუხისმგებლობა, აღიაროთ თქვენი აზრების–ქცევების–ჩვევების–ხასიათის განმსაზღვრელი როლი ბედისწერაში, თვითშთაგონების როლი, აითვისოთ ცვლილებების მართვა და თვითმართვა, გააცნობიეროთ არჩევანისა და გადაწყვეტილებათა გადამწყვეტი როლი, დაიწყოთ წარმატების მიღწევის გარდაუვალობის თვით–დაპროგრამირება. სწორედ ამ უკანასკნელს ეხება დღევანდელი სავარჯიშოც.




აიღეთ თქვენი 3 მიზანი: ერთი დროში ახლომდებარე ანუ მოკლევადიანი (ერთ წლამდე ვადით), მეორე საშუალო ვადიანი (2–3 წლის ვადიანი) და გრძელვადიანი მიზანი ( 3 წლის ზემოთ – 5–10–20 წლის). თითოეულ მათგანზე მიიღეთ გადაწყვეტილება, რომ მათ განხორციელებას დაუყონებლივ დაიწყებთ.  გამოჰყავით ამ სამეულიდან, თუ რომელია თქვენთვის ყველაზე მეტად პრიორიტეტული და გამორჩეული თავისი მნიშვნელობით. როცა გამოჰყოფთ ყველაზე უმნიშვნელოვანეს მიზანს, ამის შემდეგ განახორციელეთ სამი ქმედება:
  1. დასვით კითხვა: რა შემიძლია ახლავე, დღესვე გადაუდებლად გავაკეთო ამ მიზნის მიღწევისათვის? რა იდეაც არ უნდა მოგივიდეთ თავში, ძალიანაც უმნიშვნელო ან აბსურდულიც კი  რომ მოგეჩვენოთ, მაინც გადადგით რაიმე ნაბიჯი ან განახორციელეთ რაიმე ქმედება, რაც ამ მიზნის მიღწევას ემსახურება. აიღეთ  დაუყონებლივ და განუხრელად მოქმედების სტარტი, რაც ხვალაც, ზეგ, მაზეგ და მომდევნო დღეებსა, თვეებსა თუ წლებშიც უნდა გაგრძელდეს უწყვეტი და გადაუდებელი ქმედებების სახით.
  2. აიღეთ ქაღალდი და ფანქრები, დახატეთ თქვენი ცხოვრება იმ დროში, როცა უკვე მიაღწიეთ მიზანს. ვინ არის თქვენს გვერდით, სად ხართ, რა ხდება ნახატში, რას საქმიანობთ, რა ხასიათზე ხართ, რა პრობლემებს აგვარებთ, როგორია გარემოცვა, რას ფიქრობენ და გრძნობენ ადამიანები? დაარქვით ნახატს: „ჩემი ერთი დღე მიზნის მიღწევის შემდეგ“. შეინახეთ ეს ნახატი, ხშირად დაუბრუნდით მას და, თუ მოგესურვებათ, დრო და დრო ჩაახატეთ და დაამატეთ კიდეც რაიმე დეტალები.
  3. მისწერეთ თქვენს თავს წერილი იმ მიზან–მიღწეულ ვარიანტში. დაარქვით წერილს: „წერილი მომავალს“. თქვენ სრულიად თავისუფალი ხართ თუ რას მისწერთ თქვენს მომავალ, მიზან–ახდენილ „მე“–ს, მაგრამ გირჩევდით არ გამოტოვოთ: 1) რას გრძნობთ და სად, როგორ მდგომარეობაში იმყოფებით, როცა ამ წერილს წერთ; 2) როგორ ჩანს იმ მიზან–ახდენილი მდგომარეობიდან, თუ რა გზები და რესურსები უნდა გამოიყენოთ, რათა იქამდე მიხვიდეთ. რას გირჩევთ ამ მხრივ თქვენი მიზან–ახდენილი „მე“? რა რჩევას გაიზიარებდით და რას უკუაგდებდით?

ამ სავარჯიშოთი კიდევ უფრო წინ წავა წარმატების გარდაუვალი მიღწევის თვითდაპროგრამირების პროცესი. იბედნიერეთ!
თუ უფრო ღრმად გსურთ შესცუროთ წარმატების მიღწევის პროცესში, ჩაერთეთ  „წარმატების გარდაუვალობის“  ან „დეპრესიისა და სიღარიბის დაძლევის“ ტრენინგში. ჩაწერა და პირობების გაცნობა ტელ.: 2 14 12 12 ან მობ. 577 76 45 80. ასევე შეგიძლიათ  მომწეროთ nodarsar@gmail.com


2.06.2013

მტკიცე გადაწყვეტილება, დიდი გატაცებითა და რწმენით მოქმედება – მიზნის მიღწევის საწინდარი



წარმატების 365 დღე

გაუზიარეთ ეს გზავნილი ყველას. ამით  შეიქმნება სასიკეთო ენერგო–ინფორმაციული ველი. იგი მოგიტანთ სარგებლობას თქვენც და სხვასაც

მე–7 დღე

მაშ, ასე: არა ჩვენი ცხოვრების პირობები, არამედ ჩვენი გადაწყვეტილებები ქმნიან ჩვენს ბედისწერას. წინასწარ არავის ეგონა, რომ ჩვეულებრივი იურისტი და პაციფისტი მაჰათმა განდი ააყირავებდა ინგლისის უზარმაზარ იმპერიას და მოუტანდა ინდოეთს ნანატრ დამოუკიდებლობას. მაგრამ მაჰათმა განდის გადაწყვეტილება, რომ არა–ძალადობრივი, მშვიდობიანი გზით განეხორციელებინა თავისი კეთილშობილური მიზნები, საფუძვლად დაედო ინდოეთში უზარმაზარ სახალხო მოძრაობას. შეეცადეთ კარგად გააცნობიეროთ თუ რა ძალა აქვს იმ გადაწყვეტილებას, რომელიც ხორციელდება უდიდესი რწმენითა და მონდომებით.


თქვენც ხომ შეგიძლიათ მიაღწიოთ საოცრად ძნელად მისაღწევ მიზანს, თუკი მტკიცედ გადაწყვეტთ, რომ მთელი გატაცებით, უზარმაზარი რწმენითა და ძალისხმევით  თქვენ თვითონვე შექმნათ გარდაუვალი განხორციელებისა და სისრულეში მოყვანის წინაპირობები. თქვენ ღვთით ბოძებული განუსაზღვრელი შინაგანი რესურსების მატარებელი ბრძანდებით. ეს რესურსები ამოხეთქავენ და შინაგან ჭიშკარს გაარღვევენ იმ გადაწყვეტილების მიღებითა და განუხრელი გატარებით, რამაც შეგიძლიათ მოგიტანოთ მნიშვნელოვანი ცვლილება ცხოვრებაში. წინსვლისათვის გადადგით 3 ნაბიჯი:

ნაბიჯი
პირველი                                                                                                                                

ჩაფიქრდით და გაეცით  პასუხი კითხვას: რა იყო ის პრინციპული და ძირითადი გადაწყვეტილება თქვენს წარსულში, რამაც დღემდე მოგიყვანათ?

ნაბიჯი მეორე

ჩაფიქრდით და გაეცით  პასუხი კითხვას: რა არის ჩემი ცხოვრების ის სფერო, რაშიც მსურს მკაფიოდ გავზარდო დონე და სასურველი სტანდარტი – საზოგადოებრივი ასპარეზი თუ სწავლა, ახალი უნარ–ჩვევების ათვისება თუ ფინანსური სტაბილობა ან შემოსავლები, კარიერა თუ ცნობადობის ხარისხი, მოგზაურობა თუ სპორტი და ა.შ.? გააკეთეთ არჩევანი და აირჩიეთ თქვენთის სასურველი სტანდარტი ან სამიზნე.

ნაბიჯი მესამე

მიიღეთ გადაწყვეტილება, რათა არჩევანი მოიყვანოთ სისრულეში და მიაღწიოთ სასურველ მდგომარეობას. დაუსვით თქვენს თავს კითხვები და გაეცით მათ პასუხი: რამდენად აუცილებლად და გარდაუვალად მიმაჩნია ამ გადაწყვეტილების აღსრულება? შემიძლია თუ არა მთელი არსებით ჩავება მის შესრულებაში? რა არის ის დიდი სარგებლობა და შენაძენი, რასაც სწორედ ამ გადაწყვეტილების გამოისობით მივაღწევ? რა არის ის დაბრკოლებები და ხელისშემშლელები, რაც გზაში დამხვდება და როგორია მათი დაძლევის გზები? რა იქნებოდა ის დანაკარგი ან ზიანი, რასაც ამ გადაწყვეტილების შედეგად მივიღებდი? რა შეიძლება ვიღონო ამ დანაკარგის საკომპენსაციოდ ან ზიანის თავიდან ასაცილებლად? აქვე მინდა გაუწყოთ, რაც კვლევებით დადგინდა წარმატებულ ადამიანთა ნიშან–თვისებები, რითაც ისინი განსხვავებიან წარუმატებელი ადამინებისაგან. კერძოდ, წარმატებული ადამიანები საკმაოდ სწრაფად ღებულობენ გადაწყვეტილებას, მაგრამ შემდგომში დიდი ხნის განმავლობაში არ ცვლიან და განუხრელად  მიჰყვებიან მას, სანამ არ მიაღწევენ სასურველ მიზანს. თვით მიზნის არ მიღწევის შემთხვევაში კი საკუთრივ მიზანს ხელუხლებლად და უცვლელად სტოვებენ, ოღონდ ცვლიან მიღწევის გზებს, სანამ არ მიაღწევენ სასურველ მიზანს. წარუმატებელი პირები კი იქცევიან სრულიად საპირისპიროდ: ისინი დიდხანს ყოყმანებენ ან გადადებენ გადაწყეტილების მიღებას (ხანდახან სულაც არ გამოაქვთ გადაწყვეტილება), ხოლო როგორც კი წააწყდებიან დაბრკოლებას მიზნის მიღწევის გზაზე, იცვლიან საკუთრივ მიზანს და სხვა ახალ გადაწყვეტილებას ღებულობენ ისევ დიდი ყოყმანის ხარჯზე

მაშ, მტკიცედ დაისახეთ მიზანი, სწრაფად მიიღეთ მტკიცე გადაწყვეტილება, განუხრელად გაჰყევით მას, დაუძლეველი დაბრკოლების დროს უცვლელი დატოვეთ საკუთრივ მიზანი, მაგრამ სამაგიეროდ შეცვალეთ მისი მიღწევის საშუალებები და გზები. ამ შემთხვევაში წარმატება მოგძებნით სწორედ თქვენ!
თუ უფრო ღრმად გსურთ შესცუროთ წარმატების მიღწევის პროცესში, ჩაერთეთ  „წარმატების გარდაუვალობის“  ან „დეპრესიისა და სიღარიბის დაძლევის“ ტრენინგში. ჩაწერა და პირობების გაცნობა ტელ.: 2 14 12 12 ან მობ. 577 76 45 80. ასევე შეგიძლიათ მომწეროთ nodarsar@gmail.com

2.02.2013

არჩევანი და გადაწყვეტილება – ბედისწერის მართვის სათავეებთან



წარმატების 365 დღე
მე–6 დღე


ჩვენს წარმატებას მიზანდასახულობა და ნებელობითი ქცევა განსაზღვრავს. მაგრამ რა განსაზღვრავს საკუთრივ ჩვენს ნებელობით ქცევას? პასუხი მარტივია: ჩვენი არჩევანი და მიღებული გადაწყვეტილება. ჩვენ წარამარა ვაკეთებთ არჩევანს, თვით მაშინაც კი, როცა თითქოსდა ავტომატურად ვმოქმედებთ და არ ჩანს, რომ რაღაცას ვირჩევთ: ჩვენ ამ დროს თუნდაც იმ არჩევანს ვაკეთებთ, რომ არ გავაკეთოთ არჩევანი. ამ დროს სხვა რამ ან სხვა ვინმე აკეთებს ჩვენს ნაცვლად არჩევანს. თუკი ჩვენ ავირჩევთ, რომ ჩვენი ნებითა და არჩევანით არ ვიმოქმედოთ და არ ვმართოთ ჩვენივე ცხოვრება, არჩევანი მაინც ხორციელდება: სხვა იღებს  არჩევანს, რათა მისი ნებით ვიმოქმედოთ და მან მართოს თავის ნებაზე ჩვენი ცხოვრება.


მე ვისურვებდი თქვენ ყოფილიყავით თქვენი თავის ბატონ–პატრონი. გაივარჯიშეთ თქვენი თავი რეგულარული არჩევანისა და გადაწყვეტილების მიღების უნარის დახვეწაში. დაიწყეთ ძალიან მარტივით. მაგალითად, თქვენ შეამჩნიეთ, რომ ოდნავ მოხრილი ან მობუზული პოზით დადიხართ და ამავე დროს სახეზე მუდმივად გაწერიათ დაძაბულობა ან ჩაფიქრებულობა. აირჩიეთ და გადაწყვიტეთ იაროთ წელგამართულმა და გახსენით სახე და შეჭმუხნული შუბლი  და ნათელი გამოხედვით გაიარეთ. ან კიდევ, გაწუხებთ, რომ მუდმივად გრძნობთ ფინანსურ არასტაბილობას. აირჩიეთ და გადაწყვიტეთ, რომ დაიწყოთ მცირეოდენი თანხების, მაგალითად, ყოველი 1 ლარიანის ყულაბაში დაგროვება, რათა გქონდეთ დანაზოგები, რომელსაც საჭირო მომენტში გამოიყენებთ. ან კიდევ, შემოგეჩვიათ დილით უხასიათობა და დამძიმებულობა. აირჩიეთ და გადაწყვიტეთ, რომ ყოველ დილით გაისეირნოთ რამდენიმე კილომეტრი წელგამართულმა და თქვენს გონებაში ამოატივტივეთ ხოლმე სასიამოვნო მოგონება ან მელოდია. ან კიდევ, აირჩიეთ და გადაწყვიტეთ, რომ ყოველი დღე დააპროგრამოთ სიხარულსა და მადლიერებაზე და ყოველ დილით თქვენს თავს დაუსვით შემდეგი კითხვები: 1) დღეს რა ან ვინ გამახარებს? 2) დღეს ვის და რით გავახარებ? 3) დღეს ვისი მადლიერი ვიქნები? 4) დღეს ვინ იქნება ჩემი მადლიერი? ან კიდევ, გრძნობთ შფოთვასა და აფორიაქებას. აირჩიეთ და გადაწყვიტეთ რეგულარულად ილოცოთ. ან აირჩიეთ და გადაწყვიტეთ ჩაატაროთ მედიტაცია.  შესაძლოა ეს გადაწყვეტილებანი და არჩევანი პატარად მოგეჩვენოთ, მაგრამ არჩევანსა და გადაწყვეტლების მიღებაში გავარჯიშება გაგიყვანთ უფრო პრინციპულ და გრანდიოზულ გადაწყვეტილებამდე, რამაც შესაძლოა თქვენი ცხოვრება სრულიად შეცვალოს.

თქვენი გადაწყვეტილება თესლია, რომელიც ნიადაგში ხვდება და გამოიტანს შედეგს. გადაწყვეტილება თესლია ანუ მიზეზია, რასაც მომავალში მოვიმკით შედეგის სახით. მაგრამ თესლის გარდა ნიადაგის ხარისხიც მნიშვნელოვანია, ხოლო ნიადაგი წინაპირობის სახით გვევლინება. გადაწყვეტილების მიღების დროს ნიადაგად ანუ წინაპიროპად გვესახება ჩვენივე განწყობილება (ოპტიმიზმი, ენთუზიაზმი, სიხარული და პოზიტიური მოლოდინი, რწმენა)  და ემოციური მდგომარეობა. კარგი განწყობილებისა და პოზიტიური ემოციების ფონზე მიღებული გადაწყვეტილებისა და მისი ხალისით შესრულების დროს იზრდება იმის ალბათობა, რომ კარგი გადაწყვეტილებით (თესლით) კარგი შედეგები მოიმკოთ.

ჩვენი არჩევანი და გადაწყვეტილებები ჩვენივე ბედისწერის სათავეა. მართეთ თქვენი არჩევანი და გადაწყვეტილება და ისწავლით ბედისწერის მართვას!

თუ უფრო ღრმად გსურთ შესცუროთ წარმატების მიღწევის პროცესში, ჩაერთეთ  „წარმატების გარდაუვალობის“  ან „დეპრესიისა და სიღარიბის დაძლევის“ ტრენინგში. ჩაწერა და პირობების გაცნობა ტელ.: 2 14 12 12 ან მობ. 577 76 45 80. ასევე შეგიძლიათ მომწეროთ nodarsar@gmail.com